闊別十年 南瓜米奇再現香港！

「Disney Halloween Time - 反轉迪士尼」裝飾

今年香港迪士尼樂園的萬聖節裝飾真是相當令人喜出望外，原以為睡公主城堡前花壇的四大迪士尼惡人已經是主要裝飾，點知原來於市鎮廣場還有一系列裝飾，其中最吸引眼球的是闊別十年的巨型南瓜米奇裝飾。

首個南瓜米奇裝飾於 2006 年舉行的「迪士尼樂園怪誕節」置於睡公主城堡前中央花壇上，相隔 10 年！南瓜米奇裝飾以新笑容在市鎮廣場上重出江湖，而加州迪士尼樂園，亦在同一位置擺放南瓜米奇裝飾已有多年。

巨型南瓜米奇下有一堆細南瓜，每個都有不同趣怪表情或奇妙星粉圖案。

今年萬聖節有十個新面孔與大家打招呼，他們全部都是稻草人，部分造型都幾嚇人，帶小朋友就要注意一下，以免嚇襯。

到迪士尼樂園必影的正門米奇花壇，今年再現豐富南瓜裝飾，整個花壇，又左至右，右至左都放上多個南瓜裝飾，可見今年樂園落足心思搞大佢。

充滿橙色萬聖節氣氛的大亭，柱上都掛上米奇及米妮南瓜頭，當然他們再位亦會於活動開始時，以一身「萬聖之王」及「萬聖之后」服飾與賓客會面合照。

美國小鎮大行兩旁燈柱，每枝都掛正笑口噬噬的可愛南瓜米奇裝飾。

大街沿途每座維多利亞式建築，都同樣掛起萬聖節裝飾！

其中「大街糖果店」上的裝飾是唯一與其他裝飾有別。配合糖果店主題，所以特別掛上以糖果為設計的裝飾，準備 Trick-or-Treat 啦！另外一提！裝飾上的米奇形糖果及冬甩於今年新春活動曾經出現過 (糖果經重新配色)。

《反斗奇兵》(Toy Story) 的「大頭寶寶」、「長腿」及「道奇」又再一次逃離阿薛屋企來到安仔後花園一角，若然之前失錯與他們合照，今次就唔好再錯失機會。